ភ្នំពេញ៖ រដ្ឋមន្ត្រីការបរទេសអាស៊ានបានចេញសេចក្តីថ្លែងការរួមមួយ ប្រកាសគាំទ្រលើការអំពាវនាវរបស់ អគ្គលេខាធិការអង្គការសហប្រជាជាតិឱ្យមានការស៊ើបអង្កេតឯករាជ្យលើរាល់អំពើឃោរឃៅគំរាមកំហែងដល់ជនស៊ីវិលស្លូតត្រង់ រួមទាំងនៅក្នុងទីក្រុង Bucha ដើម្បីជៀសវាងការកើតឡើងម្តងទៀតនិងដើម្បីភាពយុត្តិធម៌។

សេចក្តីថ្លែងការណ៍រួមចុះថ្ងៃទី៨ ខែមេសា ឆ្នាំ២០២២ រដ្ឋមន្ត្រីការបរទេសអាស៊ាន បានចូលរួមរំលែកទុក្ខដល់ប្រជាជនអ៊ុយក្រែនចំពោះការសម្លាប់ជនស៊ីវិលនៅអ៊ុយក្រែន និងបានអំពាវនាវជាថ្មីឱ្យមានការខិតខំប្រឹងប្រែងពីគ្រប់ភាគី និងភាគីសហគមន៍អន្តរជាតិដើម្បីបញ្ឈប់ភាពតានតឹងនៃការប្រយុទ្ធគ្នាដែលថា «ជម្លោះគ្មាននាំមកនូវអ្វីក្រៅពីការបន្តការបង្ហូរឈាមឡើយ»។

ក្នុងលិខិតនោះរដ្ឋមន្ត្រីការបរទេសអាស៊ានលើកឡើងថា៖ «យើងកាន់ទុក្ខជាមួយគ្រួសារដែលបានស្លាប់បាត់បង់ជីវិត ដែលពួកគេបាត់បង់មនុស្សជាទីស្រឡាញ់ឮនៅក្នុងជម្លោះនេះ»។

អាស៊ានក៏បានរំលឹកឡើងវិញនូវការអំពាវនាវឱ្យមានបទឈប់បាញ់ជាបន្ទាន់ និងការបន្តនៃកិច្ចសន្ទនានយោបាយ ដែលនឹងនាំទៅដល់សន្តិភាពប្រកបដោយនិរន្តរភាពនៅអ៊ុយក្រែន។

អ៊ុយក្រែនបានឱ្យដឹងថា ពេលនេះខ្លួនកំពុងស៊ើបអង្កេតលើឧក្រិដ្ឋកម្មសង្គ្រាមដែលអាចកើតមានដោយរុស្ស៊ី បន្ទាប់ពីបានរកឃើញសាកសពរាប់រយ ដែលខ្លះត្រូវបានចង និងបាញ់សម្លាប់ ពាសពេញទីប្រជុំជននានាក្បែរទីក្រុងគៀវ បន្ទាប់ពីរុស្ស៉ីដកខ្លួនចេញ ខណៈក្រសួងការពារជាតិរុស្ស៊ីបានលើកឡើងថារូបថត និងវីដេអូទាំងអស់ដែលត្រូវបានផ្សព្វផ្សាយដោយអាជ្ញាធរអ៊ុយក្រែនដែលចោទប្រកាន់ថា «ឧក្រិដ្ឋកម្ម» ដោយកងទ័ពរុស្ស៊ីនៅក្នុងទីក្រុង Bucha គឺជា «ការបង្កហេតុ» ហើយគ្មានអ្នកស្រុក Bucha ណាម្នាក់ទទួលរងនូវអំពើហិង្សានៅក្នុងដៃរបស់កងទ័ពរុស្ស៊ីនោះទេ៕